Лідскі гісторыка-мастацкі музей запрашае сваіх маленькіх наведвальнікаў на інтэрактыўную экскурсію “Згадкі з беларускай хаткі”, якая праходзіць на базе выстаўкі “З XIX у XXI”.
Вас чакаюць рэчы, якія стаміліся за час свайго жыцця, а цяпер адпачываюць на нашай выстаўцы. Але як толькі вы сюды заглянеце,яны ажывуць, наперабой паспяшаюцца расказаць пра сябе: якую карысць прыносілі свайму гаспадару, як сам гаспадар да іх адносіўся, у якія прыкметы верыў падчас іх выкарыстання, якія магічныя словы і дзеянні суправаджалі гэтыя прадметы.
Узгадваючы казкі і іх герояў, а таксама міфічных істот Хатніка, Бабу Ягу, пазнаёміцеся з душой хаты – печчу.
А вось і люлька. Дзіцятка плача! Як яго супакоіць? Будзем люляць, калыханачкі спяваць…
Першымі слухачамі экскурсіі “Згадкі з беларускай хаткі” стала група дзіцячага садка № 34 і іх педагогі Клімовіч Ірына Станіславаўна і Едунова Алена Вікенцьеўна.
Шчыра дзякуем за імкненне з маленства закладваць у душы сваіх выхаванцаў цікавасць да спадчыны роднага краю, роднага слова, бо з гэтага і пачынаецца любоў да зямлі Беларусі.
Запрашаем і вас на сустрэчу з цікавым і забаўляльным, знаёмым і незвычайным скарбам, беражліва сабраным супрацоўнікамі музея разам з руплівымі аматарамі народнага побыту Лідчыны.
Не забудзьце запрасіць сваіх сяброў!
