Сардэчна запрашаем на музейна-педагагічны занятак «Ад Вербніцы да Вялікадня». У праграме знаёмства з традыцыямі гэтых вясновых свят – самых светлых у народным календары.
«За тыдзень – Вялікдзень»,– казалі нашы продкі, асвенціўшы галінкі вярбы ў нядзелю. Навошта асвячалі вярбу? Ад чаго яна аберагала, лячыла? Як бацькі выкарыстоўвалі галінкі гэтага дрэўца ў выхаванні сваіх дзетак?
«За тыдзень – Вялікдзень». А тыдзень гэты называўся Белым. Чаму? У які дзень фарбавалі яечкі? Навошта гаспадынькі да свята збіралі шалупінне цыбулі? Што сімвалізуе чырвоны колер пафарбаванага яйка? Як сабраць велікодны кошык? Хто такія валачобнікі, жачкі і чаму іх чакалі ў кожнай хаце?
Адказы на гэтыя і іншыя пытанні атрымаеце ў час занятка.
Цікавым будзе не толькі паслухаць, як бавілі час нашы продкі на Вялікдзень, а і самім пагуляць у «Біткі», «Качанне яек», стаць удзельнікамі дзіцячага абрадавага гурту «Жачкі».
Далучайцеся да нашага святочнага настрою!
