17 студзеня 2025 г. у Лідскім замку адбылося адкрыццё перасоўнай выстаўкі «Саюзная крэпасць».
Выстаўка прысвечана беларуска-расійскай спадчыне абарончай архітэктуры і арганізавана сумесна з дзяржаўным музеем «Смаленская крэпасць» і Расійскай акадэміяй архітэктуры і будаўнічых навук. У экспазіцыі — 25 планшэтаў з выявай сучасных і архіўных фотаздымкаў, малюнкаў, чарцяжоў, вайскоўцаў розных эпох, а таксама падлогавая карта беларуска-расійскіх крэпасцей. Выстаўка змяшчае QR-коды, якія накіроўваюць наведвальнікаў да сайтаў, дзе можна пазнаёміцца з інфармацыяй пра гісторыю канкрэтнага збудавання. Планшэтная экспазіцыя дае магчымасць наглядна пабудаваць рэальны маршрут ад меж Маскоўскай вобласці да беларускага Брэста. Уключае ў сябе самыя вядомыя крэпасці і замкі, а таксама ўмацаваныя храмы і манастыры абедзвюх краін. Наведвальнікі могуць пазнаёміцца са спадчынай абарончай архітэктуры, як захаванай да нашых дзён, так і вядомай толькі па графічных крыніцах і пісьмовых згадках.
Падчас адкрыцця выстаўкі адбылося падпісанне пагаднення аб супрацоўніцтве паміж Дзяржаўнай установай «Лідскі гісторыка-мастацкі музей» (г. Ліда, Рэспубліка Беларусь) і дзяржаўным музеем «Смаленская крэпасць» (г. Смаленск, Расія).
Выстаўка ў Лідскім замку будзе працаваць да 23 лютага 2025 г.
