Экспазіцыя “Сучаснае мастацтва краю” – своеасаблівы дакумент эпохі, які прэзентуе творчасць сучасных мастакоў Лідчыны, як ураджэнцаў, так і тых, чый творчы і жыццёвы шлях звязаны з нашым краем. Праз гэтыя творы наведвальнік пазнаёміцца з калекцыямі выяўленчага мастацтва дзяржаўнай установы “Лідскі гісторыка – мастацкі музей”.
Вашай увазе прапануюцца больш за 100 аўтарскіх твораў, размешчаных у раздзелах: “Жывапіс”, “Графіка”, “Скульптура” і “Дэкаратыўна-прыкладное мастацтва. Мастацкае шкло”.
Творчыя людзі бачаць свет па-асабліваму, адсюль разнастайныя мастацкія стылі і тэхнікі, бо яны падкрэсліваюць уласны погляд аўтара на рэчаіснасць.
Такім чынам, мы як быццам бы глядзім яго вачыма, разумеем яго, становімся бліжэй да творцы. Гэтая экспазіцыя як калейдаскоп, дзе зусім нечакана суседнічаюць адзін з адным вельмі не падобныя паміж сабой творы. Так бывае ў жыцці, калі адна падзея ідзе за другой, але паміж імі існуе нябачная, моцная ўнутраная сувязь паміж мастакамі аднаго краю. Кожны эпізод нашага жыцця, кожная жыццёвая з’ява пакідае ў душы след, гучанне. У нейкі момант гэтыя сляды рэалізуюцца ў мастацкія вобразы, і мастацтва раскрывае перад намі ўнутранае багацце творцаў, адорвае цікавымі і тонкімі пачуццямі, узбагачае наш духоўны свет.
